Xaghra United F.C.

Kull ġrajja fl-istorja hi l-frott u r-riżultat ta’ deċiżjonijiet li jkunu ttieħdu u azzjonijiet li jkunu saru fil-passat qrib u anke mbiegħed. L-istess jgħodd għall-ġojjell li qiegħed tant għal qalb tagħna x-Xagħrin... it-tim tagħna tal-futbol... Xagħra United.

Wieħed jista’ jgħid li t-twaqqif tal-Moviment tal-Boy Scouts fix-Xagħra fl-1933 kien il-preludju ta’ attivita’ f’numru ta’ oqsma kulturali. Fost dawn wieħed isib il-twaqqif tal-Banda fl-1934.
Sentejn wara, fl-1936, ir-raħal tax-Xagħra ra t-twelid tal-ewwel tim tal-futbol.

Propjament il-kumitat fi ħdan il-Moviment tal-Boy Scouts li kien responsabbli mit-tim tal-futbol, twaqqaf fix-xhur ta’ Frar/Marzu tal-1936. It-tim kien iġib l-isem ta’ Xagħra Scouts Team bl-ewwel kowċ ikun Ġużeppi Sultana. Dan kien possibbli bl-inizjattiva ta’ Brother Hersey li anke ħeġġeġ movimenti oħra tal-Boy Scouts f’diversi rħula Għawdxin sabiex jimitaw l-inizjattiva tiegħu.

Il-lok tal-Moviment tal-Boy Scouts serva wkoll bħala l-ewwel każin tal-futbol. Il-pjazza tax-Xagħra serviet ukoll bħala l-ewwel grawnd sabiex isir it-taħriġ tal-logħba tal-futbol.

Bl-inawgurazzjoni tal-grownd il-ġdid tax-Xewkija, bl-isem tas-“Silver Jubilee Ground” nhar l-10 ta’ Mejju, 1936, il-futbol Għawdxi seta’ jiġi organizzat aħjar u jsiru l-kampjonati.

L-ewwel suċċess tat-tim tax-Xagħra, din id-darba bl-isem ta’ Xagħra Blue Stars, laħaq il-qofol tiegħu meta rebaħ il-“Captain Renton Cup” li biha saru r-rebbieħa t’Għawdex għall-istaġun 1939-1940.

It-tim tal-futbol baqa’ sħiħ fis-snin ta’ wara minkejja ż-żmien imwiegħer tal-gwerra l-kbira bejn is-snin 1939-1945. Ta’ min isemmi li f’dan iż-żmien ma kienx jintlagħab logħob kompetittiv bejn l-irħula.Wara li għadda s-sħab iswed tal-gwerra, it-timijiet tal-futbol f’Għawdex reġgħu bdew isiru attivi u ngħata bidu għall-kampjonati bl-ewwel kompetizzjoni tkun għal “Galea’s Cup”.


L-organizazzjoni tat-tim tal-futbol baqgħet għaddejja b’ħidma sfiqa b’risq dan l-isport popolari fix-Xagħra. Sadanittant it-tim reġa’ bidel ismu għal “Xagħra Young Stars” bil-każin tiegħu jimxi mal-passi tal-każin tal-banda “Victory” fil-pjazza.

Wara li t-tim kien ġie relegat għat-tieni diviżjoni reġgħu lura għall-ogħla diviżjoni. Dan ġara wara r-reb tal-kampjonat tat-tieni diviżjoni u dik tal-K/O fl-istaġun 1961/62.

Partita oħra li biha x-Xagħra Young Stars għamlu unur lilhom infushom kif ukoll lil raħalhom kienet dik milgħuba mal-Floriana Football Club nhar il-Ħadd, 30 ta’ Diċembru, 1962. Bħala rebbieħa tal-kampjonat tat-tieni diviżjoni t'Għawdex u Floriana kampjonati ta' Malta, saret logħba ta' ħbiberija fejn it-tim Xagħri tilef bl-iskor ta' 1-0 wara wirja stupenda u oppożizzjoni qawwija kontra tim mill-aqwa.

L-istaġun 1963-1964, ra lix-Xagħra Young Stars jerġgħu lura għall-glorja meta saru l-kampjonati t’Għawdex għat-tieni darba fl-istorja tagħhom wara kwart ta’ seklu ta’ logħob kompetittiv f’Għawdex. Il-partita kienet kontra l-Victoria Hotspurs u fiha x-Xagħra rebħu bi skor ta’ 2-1. Fatt interessanti kien li l-logħba kienet replay wara li l-ewwel waħda kienet intrebħet minn Victoria Hotspurs iżda minħabba l-fatt li kien hemm linesman wieħed biss reġgħet intlagħbet wara protest.

Suċċess ieħor li għamel it-tim tax-Xagħra Young Stars lejn tmiem il-ħidma tiegħu kien bir-rebħ tal-“British-American Shield” fl-istaġun 1968-1969.

Lejn l-aħħar tas-snin 60, ir-raħal tax-Xagħra ra t-twaqqif ta’ tim ieħor tal-futbol bl-isem ta’ “Xagħra Blue Stars.” Il-lok tal-każin ta’ dan it-tim il-ġdid kien fejn għadu sal-lum, fi Triq l-Arċipriet Dun Ġużeppi Diacono. Minkejja l-isforzi tagħhom, iż-żewġ timijiet tax-Xagħra, ma tantx bdew juru riżultati pożittivi tant li fl-1971, iż-żewġ timijiet ingħaqdu flimkien. Xhieda ċara ta’ dan hu l-isem preżenti tat-tim tax-Xagħra, “Xagħra United F.C.” Il-każin tat-tim il-ġdid baqa’ dak ta’ Triq l-Arċipriet Dun Ġużeppi Diacono.

It-tim Xagħri taħt l-isem il-ġdid mal-ewwel beda bis-suċċessi tiegħu meta ġie promoss fl-ogħla diviżjoni. Fl-istess staġun rebaħ it-tazza Knock-Out tal-istess diviżjoni u l-Good Conduct Cup. Is-snin tal-1972/1973 ġabu magħhom is-suċċess tal-ESSO Cup, kompetizzjoni li ntrebħet darba biss mit-tim tax-Xagħra fl-aħħar sena li ntlagħbet.

Is-snin ta' bejn l-1973 u l-1986 ma tantx kienu żminijiet glorjużi għat-tim tal-blu u l-iswed bil-maġġoranza tal-istaġuni fit-tieni diviżjoni. Fl-istaġun tal-1986/1987, it-tim kiseb promozzjoni għall-ewwel diviżjoni b'tim żagħżugħ, Xagħri u mimli entużjażmu. Taħt it-tmexxija tal-mibki Horace Mercieca dan kellu jkun il-pedament ta' tim li ġab lura l-glorja fir-raħal. Din il-ħidma kompliet toħroġ il-frott tagħha fl-istaġun tal-1987/1988 meta it-tim ta’ Xagħra United għall-ewwel darba rebaħ il-Gemeharija Cup meta rebaħ kontra Sannat Lions bl-iskor ta' 1-0 nhar il-Ħadd, 8 ta' Mejju, 1988.

L-istaġun tal-1988/1989 hu staġun li ma jintesa qatt mill-poplu Xagħri u mill-isportivi tiegħu u jibqa’ imniżżel b’ittri tad-deheb fl-istorja tal-klabb. Fit-12 ta’ Ġunju, 1988, infetaħ mill-ġdid il-każin meta sarulu xogħlijiet ta’ rinnovament sabiex ikun lok aktar rilassanti għall-plejers u s-sapporters tiegħu.

Dan kien il-bidu ta' sena mimlija ħidma li ġabet is-suċċess f'ħames kompetizzjonijiet jiġifieri kull kompetizzjoni li daħal għaliha t-tim Xagħri. Magħqudin taħt Horace, tim li kien iffurmat minn plejers kollha Xagħrin, rebaħ il-kampjonat tal-ewwel diviżjoni flimkien mal-Independence Cup, Rothmans Cup, Gemeharija Cup u Super Cup. Victoria Hotspurs kienu l-ikbar rivali f'dan l-istaġun minħabba l-fatt li minn erbgħa f'ħames kompetizzjonijiet kienu l-finalisti għar-rebħ tat-titli. Kien biss fil-Gemeharija Cup meta Xagħra United għelbu avversarju differenti, din id-darba, lix-Xewkija Tigers fil-finali. Is-suċċess ta' dan l-istaġun kien imżejjen b'ċelebrazzjonijiet kbar wara ħamsa u għoxrin sena ta’ stennija għar-rebħ tal-kampjonat.

Wara staġun bla unuri, dak tal-1989/1990, l-istaġun tal-1990/1991 reġa' ġab is-suċċess lura fuq l-għolja ta' Casal Caccia, din id-darba bir-rebħ tal-Independence Cup u l-Gemeharija Cup. Dan kellu jkun il-bidu ta' sentejn oħra glorjużi ferm għal Xagħra United, sentejn konsekuttivi ta' meta t-tim ġie nkunurat bit-titlu tal-ewwel diviżjoni. Din id-darba taħt il-kappa tas-Sur Frankie Muscat, it-tim kollu żgħażagħ mix-Xagħra, rebaħ il-kampjonat tal-1991 u dak tal-1992 flimkien mal-Independence Cup fl-istess sena u l-kampjonat u dak tal-Gemeharija Cup fl-istaġun tal-1992 u 1993. Din kienet l-ewwel u l-unika darba fl-istorja tal-klabb li ġew mirbuħa żewġ kampjonati konsekuttivi. Il-poplu Xagħri kien fis-seba' sema u kien dara jiċċelebra ġmielu wara r-rebħ ta' tliet kampjonati f'ħames staġuni.

Il-ħidma tal-kumitat flimkien mal-kowċis u l-plejers laħqet il-qofol tagħha erba' staġuni wara meta t-tim reġa' għex staġun stupend fis-snin 1997/1998. Din id-darba taħt il-gwida ta' Eucharist Mercieca, bil-preżenza wkoll ta' żewġ plejers barranin u xi plejers barra mir-raħal li nġiebu biex jissaħħaħ it-tim, reġa' wasal ir-rebħ tal-kampjonat u l-GFA Cup. Wara logħba kumbattuta kontra Nadur Youngsters li spiċċat bl-iskor ta' 3-1 u li tibqa' mfakkra għall-preżenza numeruża tas-sapporters Xagħrin, il-poplu ċċelebra bil-kbir is-suċċess tas-sitt kampjonat u l-aħħar wieħed sal-ġurnata tal-lum.

L-istaġun ta' wara, dak tal-1998/1999, reġa' ġab is-suċċess tal-GFA Cup, iżda minn dakinhar ’l hawn kienu żminijiet diffiċli għat-tim tax-Xagħra United. Wara li kien ġie relegat għat-tieni diviżjoni, it-tim reġa' rebaħ il-kampjonat flimkien man-Knock Out fis-snin 2001/2002 taħt it-tmexija ta’ Horace Mercieca.

Sfortunatament, l-istaġun 2002/2003 ra lit-tim tax-Xagħra United jerġa’ jiġi relegat għat-tieni diviżjoni. Din id-darba, taħt it-tmexxija ta’ John Cassar, Xagħra United reġgħu rebħu t-titlu tat-tieni diviżjoni mill-ewwel (staġun 2003/2004) u hekk reġgħu ġew promossi għall-ewwel diviżjoni.

Wara erba' staġuni fl-ewwel diviżjoni fejn kien hemm ukoll tentattiv għar-rebħ tal-kampjonat, fl-2008 it-tim reġa' ġie relegat għat-tieni diviżjoni. Wara ħidma sħiħa bejn il-kumitat, kowċis u plejers, din is-sena Xagħra United reġgħet lura fejn jixraqilha. Wara r-rebħ tan-Knock Out Cup kontra Kerċem Ajax, b'logħba decider kontra Żebbuġ Rovers, it-tim Xagħri għalaq il-kapitlu tal-kampjonat meta rebaħ b’riżultat ta' 3-1 u spiċċa rebbieħ tat-titlu u promos għall-ewwel diviżjoni.

L-istorja ta’ dan it-tim hija mżewqa b’ħafna ġrajjiet ta’ nżul u tlajja, dieqa u glorja. Il-passat tat-tim ikompli jgħallem ħafna lezzjonijiet lill-plejers u lis-supporters preżenti. Huma erbgħa l-valuri li dejjem żammew il-ħeġġa qawwija fit-tim tax-Xagħra United: Dedikazzjoni, Sagrifiċċju, Għaqda u Perseveranza. Dawn il-valuri għadhom il-mixegħla li għadha tmexxi t-tim tax-Xagħra United, il-messaġġier tal-ħeġġa u l-forza tal-poplu Xagħri sa mit-twaqqif tal-futbol 75 sena ilu.

Il-Klabb tax-Xagħra United jgħid GRAZZI kbira lill-poplu Xagħri tal-fiduċja li wera’ fit-tim tiegħu billi mhux biss bagħat lil uliedu ħalli jkunu ta’ xhieda u jonoraw l-arma li kienu jġorru fuq il-flokk tul dawn is-snin, imma wkoll ta’ kull għajnuna finanzjarja u anke morali li ta lill-Klabb tagħna. Jalla l-imħabba li ħafna wrew u li qed juru lejn r-raħal tagħna permezz tal-ħidma tagħhom fil-Klabb, tibqa’ tħeġġeġ f’qalb kull Xagħri biex dan raħalna jkun minn ta’ quddiem anke f’dan il-qasam sportiv. Viva Xagħra United.